श्री शिवशंकराष्टकम्
रुद्राय लोकसुखदाय जटाधिपाय भाले त्रिपुण्ड्रलसिताय महेश्वराय।
गङ्गाधराय गिरिशाय दिगम्बराय तस्मै नमो भगवते शिवशंकराय ।।
भूतेश्वराय गिरिजापतये हराय श्रीशम्भवे बलवते महते मृडाय ।
लङ्केशरावणनिशाचरवन्दिताय तस्मै नमो भगवते शिवशंकराय ।।
तुङ्गेश्वराय गिरिभूजनपूजिताय कल्पेश्वराय हिमनिर्झरिणीधराय ।
पञ्चप्रयागपतये च सतीश्वराय तस्मै नमो भगवते शिवशंकराय ।।
ईशाय पर्वतधवाय गणेश्वराय शर्वाय मन्मथहराय वृषध्वजाय।
मृत्युंजयाय जगतीपरिपालकाय तस्मै नमो भगवते शिवशंकराय ॥
गुप्तेश्वराय मृगचर्मविभूषिताय रूपेश्वराय वसुमूर्तिसमाहिताय ।
योगेश्वराय विधुभूषितमस्तकाय तस्मै नमो भगवते शिवशंकराय ॥
विद्वत्समाजमुखवर्णितवैभवाय गङ्गापवित्रसलिले कृतमज्जनाय ।
सिद्धिप्रदाय भजतां समशर्मदाय तस्मै नमो भगवते शिवशंकराय ॥
पुण्यात्मकाय निधिदाय वरप्रदाय भक्तप्रभाबलधनादिविवर्धकाय ।
ऐश्वर्यभोगरहिताय महासुराय तस्मै नमो भगवते शिवशंकराय ॥
हे भूतनाथ नगनाथ भुजङ्गनाथ कैलासनाथ शिव पाहि हिमालयेश।
भक्तोऽस्ति यस्य कविरामकिशोरमिश्रः तस्मै नमो भगवते शिवशंकराय ॥
(आचार्य श्रीरामकिशोरजी मिश्र)
